【職場熱話】一人一個打工仔被炒原因！同事工作能力高遭老闆妒忌、打工仔首次遲到便遭解僱……

CTgoodjobs' Editor

Published: 2024-05-24

Updated: 2024-05-24 10:25

員工遭到解僱的原因林林總總，最常見的都是個人失職、工作表現惡劣或與同事的關係惡劣等。不過，有部分公司在解僱員工時，均會使用一些極度無理的解僱原因，讓打工仔成為辦公室的犧牲品。

近日，有網民於連登討論區上以「一人一個被炒原因」為題發帖，吸引眾多網民留言，分享自己在職場遭到解僱的原因，當中竟有些奇怪的原因，使網民啼笑皆非！

延伸閱讀：【00後】新入職00後工作能力高但都被炒？原因係⋯⋯網民：香港啲管理層幾時識睇化啲？

按圖了解網民回應：

+20

+19

樓主：嗰陣份工未過試用期，同同事一齊落完site，然後大家一齊無返公司直接早走，之後畀我直屬上司發現咗我無返公司。佢晏晝5點半打嚟係咁鬧，話我點解粒聲唔出就自己走咗，上司直接同咗經理講，隔咗陣經理就叫我一係自己遞信走，一係就直接炒……

網民A：有次team presentation 4日前畀我發現到份project有個好嚴重嘅問題，其他同事同老闆都唔知。同啲同事講，佢哋不斷叫我扮睇唔到，由老闆畀客鬧就算。嗰陣後生仔唔肯聽，老細行埋嚟問我做成點，我好直接咁同佢講咗份嘢有問題。

之後我自己通咗3日頂做好份嘢，老細全程無出過聲，但feel到佢有少少黑面。去到present嗰日，個問題解決咗，個客都好滿意。但第日老細就即刻炒咗我，其他同事就加bonus……細個唔識人情世故，以為幫公司解決問題係最緊要，經歷過呢件事之後，學識咗打工仔唔好咁多事……

網民B：喺試用期嗰陣請太多假，然後就畀老細炒。

網民C：有同事坐喺HR阿頭前面，個同事日日遲到、Lunch遲返、返返吓工成日唔知走咗去邊。有日HR阿頭睇唔過眼，不點名批評同事上司無做好管理，第日個同事就畀人炒咗。

網民D：有日個經理問我之後有咩打算，我話嚟緊打算去讀書，第2日就抄咗我……

網民E： A公司人事部無啦啦屈某位同事喺公司server下載公司文件，但嗰時個個都WFH，根本無可能做到。A公司仲要搵律師逼個同事簽紙，承認自己盜竊公司文件，個同事又唔知點解會肯簽，最後即時解僱咗個同事，唔使賠錢畀佢。

網民F：老細有日中咗六合彩，佢直接退休，執咗成間公司，我同班同事就咁畀佢炒咗……

網民G：我每日返工都好準時，有日唔小心遲到，就無啦啦畀老細炒……心諗我都係遲一次到啫，又唔係啲咩大問題，懷疑老細想炒我好耐，遲到畀到個藉口佢……

網民H：返工同個女同事傾得幾開心，每日都會一齊食lunch、收工一齊行街睇戲咁，係純友誼關係。持續咗1個月之後，發現個女同事原來係老細二奶嚟，然後開始發現老細成日對我黑面，態度好差。隔咗陣畀佢直接炒埋。從此唔敢再同啲女同事咁friend，好驚又會得罪人……

網民I：之前返過1間細公司，每日返工都好忙，但我因為收工前做得晒啲嘢，所以我每日都會準時走。隔咗2個月，個上司話要炒我，原因話我唔主動OT……

網民J：有公司好多時會用啲好奇怪嘅理由嚟炒人，有朋友用公司電腦USB位差電話，老細見到就話辦公室係禁止用USB，同事因為違規所以要即炒……

網民K：話我頭髮太長，影響公司形象……

延伸閱讀：【見工面試】面試官問起上一份工點解被炒求職者可以點答先好？

不少網民都分享了自己遭到解僱的原因，有部分是他們因為個人失職及表現欠佳所導致，例如經常遲到早退、外出工作沒有知會上司就提早下班等。有眾多網民分享了令人咋舌的解僱原因，例如因工作能力過高，遭到老闆妒忌、用公司電腦USB插頭替自己充電，甚至老闆突然中六合彩而決定提早退休，公司一併結業等，讓一眾網民都對事主的經歷感到同情。

延伸閲讀：【職場八卦】打工仔嘆低學歷做NGO真係好灰心事主：學歷低，經驗幾多都冇用