【伏工奇遇記】返新工第1日無簽約第2日簽完約之後即畀公司炒！事主：大家搵工真係要小心啲……

2024-08-13

不少打工仔都會透過轉工的方法來獲得更好的薪酬福利及職場發展機會，不過有時求職心切，一不留神便會誤墮「伏工」陷阱。近日，有網民於香港討論區發文，指自己入職新公司時遇上種種奇怪之事，更在簽約後翌日遭到公司以不適合為由解僱，使事主質疑自己是否「中伏」，並勸勉其他打工仔在找工作時應該要小心為上。

延伸閱讀：【招聘搵工網推介2024】如何避免搵中伏工？伏工8大特徵︰面試官態度、幾時加人工都關事？

按圖了解網民回應：

+18

+17

事主：想問吓大家我係遇到伏工？新工面試嗰陣，去到最後我就問咗面試官啲問題，正當問完以為完嗰陣，個面試官不斷追問我係咪真係冇其他問題，佢好似一把機關槍咁追住我嚟問。其實我要問嘅都問咗，點解仲要追住我問……

見完工過咗2日，間公司就打嚟叫我返工，喺電話入面，個HR話份工係5天工作，同叫我第一日返9點15分先。第一日返工，上司好快就安排咗啲工作畀我做，我問佢唔使簽約咩？佢就話今日之內會畀份約我簽。我就諗唔係應該簽咗約先開工咩？可能我之前份份工都係簽咗約先返，所以當刻我就覺得有啲奇怪。

去到放工嘅時候都未有份約畀我簽，所以問咗隔籬位同事，佢話之前都係過咗幾日先有份約簽到，佢話應該聽日會畀份約我簽。問題係我根本唔知份工返幾點，HR又無同我講過……同事就話應該跟返今日返工時間就得。

當我走咗嘅時候，個HR就WhatsApp我話聽日唔係返9點15分，但喺公司個陣佢又無講清楚，好似以為我會知咁？我再同佢講我未簽約嘅問題，佢先話聽日畀我簽……點解簽約要我去追？如果公司無心請人就唔好請啦。

第二日返工，終於簽到份約，但份約係寫我要返5日半而唔係5日，當刻已經心知不妙，明明喺電話度講到明返5日，點解最後變咗5日半？但奈何我都已經返咗一日，如果唔簽就等於第一日做咗義工，所以都逼住簽落去。點知簽完之後，第二日就突然炒咗我……咁大個人真係第一次遇到。大家搵工嘅時候真係要小心啲！

網民A：公司有無講咩原因所以炒你？

網民B：有啲公司請人為咗保障公司利益行，開頭係想你過嚟試工，所以唔會畀合約你簽。如果佢哋覺得你做嘢唔夠醒目或者上手慢，就算你簽咗約都會搵啲奇怪理由炒你，遇到呢啲尖酸刻薄嘅公司都係早走早着啦！

網民C：如果有人工就算，可能佢哋覺得你唔適合，又無話咩伏唔伏嘅。

網民D：想知公司有無出返第一日份糧畀你？

網民E：好耐之前喺荔枝角返過一份shipping clerk。嗰份係我啱啱Asso 畢業第一份工，因為難得搵到工，所以畀HR壓價壓到低過$7,000都照做。第一日返工簽約嗰陣，我問HR邊日會出糧，佢竟然話我係咪好驚公司唔會出糧畀我……嗰陣完全唔識反應，所以唯有say sorry，話唔知唔可以問。返呢份工嗰陣都好難受，日日都畀其他同事恰，返咗1個月左右，HR話因為啲同事好唔滿意我，所以決定炒我……

網民F：我有朋友之前返過一份工，公司有個老海鮮專針對啲覺得會威脅到佢哋位嘅新人，我朋友同另一個員工最後返咗一個禮拜就頂唔順辭職……

網民G：份工無話有試用期？無試用期嘅工通常都好伏！

網民H：第二日就話唔適合要炒，有無咁快知你唔啱呀？

網民I：其實你畀人炒都好事嚟，份工擺明有伏，無啦啦5日變5日半。

網民J：建議講間公司名出嚟，畀大家警剔吓！

網民K：份工擺明就伏啦，你仲問係咪伏工？

延伸閱讀：【職場熱話】斥同事雙重標準打工仔4個月轉7間公司　網民：想搵正常職場環境嘅工難過登天

對於事主的疑問，不少網民都認為該工作實屬「伏工」，例如在錄取時說5天工作但突然改成5天半工作、事主及同事均在第一天上班時沒有簽約、簽約後翌日以不適合為由解僱事主的行為令人匪夷所思，因此都為事主遭到解僱，無需繼續任職「伏工」而高興。

有部分網民指出，現時有部分公司以保障公司權益為由，會先假裝正式錄取求職者，安排他們上班。不過，公司卻沒有對他們說明首天上班為試工，然後暗中觀察他們的表現。當求職者詢問簽約事宜，會以不同藉口拖延他們。網民都斥責這種做法可恥，並不尊重求職者，因此建議其他人一旦遇到這種情況便立刻辭職，避免自己「中伏」。

延伸閲讀：【伏工特徵】入職2周果斷辭職！全因發現公司2大離譜狀況？事主：難怪一直請唔到人！

按圖即看網民盤點伏公司的特徵：

+18