Next
【見工奇遇記】見工即畀Offer！返工簽約竟被老闆用1理由彈鐘？求職者：點解要特登叫我上嚟拒絕我？
【見工奇遇記】見工即畀Offer！返工簽約竟被老闆用1理由彈鐘？求職者：點解要特登叫我上嚟拒絕我？
2024-11-04
經濟不景，失業率維持一定水平，找工作並非容易的事。為了收入着想，若獲應徵公司的錄取通知，求職者多數都會決定接受。有求職者在Threads講述個人經歷，指自己在面試後不久，就收到公司的錄取通知，上班當天簽約，公司老闆竟然用1理由拒絕求職者，「為甚麼要故意叫我上公司，再拒絕我？」
點圖了解更多事主個人經歷：
事主：「呢單嘢驚世駭俗！真係要詳細記錄！係我幾個月嚟第一個，亦都係唯一一個Offer。間公司10個人左右，見我嗰個就係老闆兼上司。Interview唔難，但佢突然問『結咗婚幾耐？短期內打唔打算要BB？』我已經覺得好突兀，仲要繼續問：『老公返咩工？』、『屋企人會唔會等你收工趕返去煮飯？』。
真心覺得好冒犯，同埋關你咩事？佢話『我哋初步OK你，想同你傾Offer順便簽約。』我一臉問號，但我未試過呢種情況，完全唔識應對，叫佢不如電話講咗先。我話要諗諗，佢話我不如聽日上嚟一次過傾。為表示誠意，我照上咗去。
個Package同大公司一定冇得比，HR係咁呃我話老細好好人，都唔算多嘢做，可以試咗先，今日簽約，星期一返工。
我：太急，要諗諗，不如星期一覆你，再下星期一返工。
因為我無論如何都想有份工返住先，所以最後都係take咗呢個Offer，HR叫我星期三上去簽約，我就問可唔可以返工先簽，佢話唔得。但我星期三唔得閒，所以約咗佢星期五簽。
星期五朝早10點上到去，老細個樣有啲凝重行入嚟，佢話：『我啱啱嗰個星期去咗出差，今日先返工，就聽到HR話你拖咗成個星期先嚟簽約，我覺得好insecure and uncomfortable，覺得你唔係真心想喺我哋公司做，係騎牛搵馬，既然係咁，不如你繼續搵吓先啦』我真係Shock到黐線，雖然佢講得啱，但我都冇錯，亦都已經好配合，使唔使咁樣？
我嘗試解釋我都好有誠意，但佢仍然堅信佢嘅諗法先係啱。我：『既然係咁，我都覺得好insecure and uncomfortable，無謂勉強』跟住轉身就走。真係黐線，打個電話叫我唔使嚟咪得，特登叫我上嚟噴我。根本只要我星期四上嚟簽咗約，而唔係等佢啱啱返嚟出完trip返公司先簽約，佢已經唔會覺得insecure and uncomfortable。」
網民回應：
A.佢interview咁問人，係咪家庭崗位歧視呀？
B.「老細好好人」
C.我可能會答我紥結咗兼獨居，但本小姐要準時收工煮飯畀自己食。
D.我覺得個老闆嘅憂慮好合理，因為喺佢角度，連簽約同開工日期都要公司不斷遷就，佢會憂慮究竟你係咪真係兼顧到家庭同工作。
不過間公司做得最差嘅係，係確定唔簽既，就唔好玩嘢叫個candidate上嚟啦，浪費人時間。
E.可能HR好想請到人，可能已經請咗好耐，所以呃你簽左約先。但因為你要考慮 （好正常），所以就發生咗咁嘅事。仲以為你可以做到1星期，賺下零用錢先走。
F.返唔到都應該唔係你嘅損失。
G.咁有冇出返嗰個鐘嘅糧先？
H.佢咁樣問有機會構成家庭崗位歧視，見工一向都唔可以問年齡，結婚未，佢仲要問得咁deep，有理由相信佢係覺得你要返屋企煮飯、洗衫、湊仔而影響工作所以唔請。
I.應該係勁等人用，氹咗你返工先，同埋老闆咁問得應該係會成日都要OT。
J.個老闆係混吉嘅，不過我覺得佢冇講大話；個HR亦都冇講大話，大家都只係老老實實咁樣分手。
個老闆最衰嘅係如果根本唔想請你，就唔好浪費你時間約你過去啦！咁都叫做好人真係……
K.呢啲工入到去做都好快想走，年尾啲opening係kam kam地。
L.唔係呀，你應該好慶幸冇簽約呀，你睇呢個老闆咁三心兩意，你返第一日工都會出事。同埋佢問得呢啲嘢，根本就係想請個單身嘅人返嚟覺得可以俾佢任OT。
網民都認為事主沒有入職公司，是否不幸之中大幸，因為這份工看起來像伏工。有網民就認為事主一直未簽約，令老闆感到不安是很正常的事，不過對方決意不聘請事主，好應該致電事主，讓他不用到公司一趟，這樣當面拒絕事主，只會浪費事主時間。有網民就認為老闆問及事主的家庭狀況，有機會干犯《家庭崗位歧視條例》。
其實上述的事件有機會觸犯《家庭崗位歧視條例》，這條反歧視法例於1997年正式通過，規定任何人或機構基於家庭崗位而歧視另一人（不論男女），即屬違法。
按圖了解《家庭崗位歧視條例》重點：
生仔就等於叻？（點圖了解更多）
延伸閱讀：【兩性關係】女友放工同男同事北上食飯好正常？ 網友：至少唔係全男班？
延伸閱讀：【見工奇遇記】面試填問卷被HR質疑！被問點解入職先考慮「同事相處融洽」！求職者1個答案被HR稱讚！
延伸閱讀：【職場偶遇】世界真細小？新入職發現男同事竟然係⋯⋯事主：我已經想辭職
延伸閱讀：【職場熱話】前同事去咗競爭對手公司度做 老細要求打工仔同佢斷絕來往 事主：仲恐嚇要報警拉我⋯⋯
最新專訪片︰
【星級斜槓族】Cloud雲浩影曾做過侍應、補習老師及派傳單 風格多變深受觀眾喜愛 冀能實現演唱會夢
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!