【裁員潮】被裁必經公司「逼人自離四招式」？網民：自我懷疑就「中圈套」！

CTgoodjobs' Editor

Published: 2026-03-30 14:15

Updated: 2026-03-30 14:15

經濟下行，不少企業亦傳出需要結業或裁員的消息，令一眾打工仔亦人心惶惶。許多公司為了節省裁員時的成本，有可能會採用各種手法，逼使員工自動離職，不用賠償任何額外的補償金。公司普遍也會用一些冠冕堂皇的說法包裝所用的方法，使得員工壓力加劇而萌生離職的念頭。

網民在網上討論群組「裁員炒人消息關注組」上以「公司唔會炒人，但會用4招逼你自動離職」為題發文表示公司常以「減磅」、「執位」、「架構重組」等理由包裝即將裁員的事實，以壓力手段令打工仔飽受精神壓力，從而加大員工離職的機率，但其實通通只是公司希望節省下裁員成本的常用技倆，引網民熱議。

即睇事主分享及網民回應：（按圖了解）

+42

+41

事主：唔知大家有無覺得「減磅」、「執位」、「架構重組」呢幾個詞幾咁可笑又哽耳。

而家好多公司明明想裁員慳成本，但為咗避開「主動解僱要賠錢」嘅責任，就出盡各種「架構重組手段」逼員工自己遞信。

內地好常用「優化」呢兩個字，但放喺香港，根本係當代職場最虛偽嘅術語。唔使舞刀弄槍，公司只需耍幾招，就搞得你要自己執嘢走人。

今日同大家拆解吓「公司逼人自離」嘅陰招！睇得穿套路，先有資格講破局！

第1招：亂調職、狂加工作量再雞蛋裏挑骨頭

早上先畀上司拍膊頭讚「能者多勞」，下午就收「調職信」——新職位個名鑲金咁靚，做嘅嘢就似「垃圾桶」，仲要美其名畀你「多崗位鍛鍊」。

《僱傭條例》畀佢哋玩到出神入化，例如調你去外埠叫「公司戰略」、塞你入冷宮部門叫「人才梯隊建設」。

合理調職本身係公司權利，但如果新崗位同原本工作差天共地，明顯係「非善意調動」。收到古怪調職安排，口頭通知當無通知到。記得要公司出書面《調職通知》，即刻白紙黑字以書面反對。記住「公司無權強制調職」！「瘋狂加工作量再搵錯處」亦係慣用手法。呢招初期好難察覺，等你做到氣咳自然錯漏百出，上司就有藉口日日召見，搞到你身心透支。壓力爆煲之日，就係你自動辭職之時。

第2招：玩殘KPI變相減人工

今個月目標係「維護客戶關係」，下個月突然要「每日新增50個客」。做唔到就扣KPI，做到就話「目標定得太低要升級」。

呢套連環拳專攻人性弱點，先令你自我懷疑：「係咪我工作能力有問題？」再引你接受減薪：「達唔到標唯有收少啲」！到你醒覺時，糧單已經七除八扣，連MPF都當係「公司福利」按最低供款。之前有間公司被踢爆用「末位淘汰法則」考核，實行末位淘汰。最離譜連清潔阿姐都有KPI垃圾桶唔可以滿超過15分鐘……

遇到離譜KPI記得書面反對，留證據日後追討。

第3招：職場PUA、令你陷入精神內耗

由某個朝早例會開始，老闆望你嘅眼神開始厭惡性。Business Proposal當眾掟都算濕碎，最陰毒係連續三個月畀你B級評核，然後扮好人提議：「不如你自動辭職，仲可以留返啲面？」呢套招式似慢刀鋸頸，今日話你「冇學習能力」，聽日嫌你「冇創新思維」。等到你真係信自己能力有問題時，佢哋連賠償都慳返。現實往往更毒辣：佢哋灑嘅係包住糖衣嘅砒霜。貶低你只係為慳番無理解僱嘅賠償金，你當真？

第4招：孤立排擠、打入冷宮

座位被調去廁所隔籬；部門開會食飯冇人通知你；新project無你份；喺WhatsApp群講嘢似掉入黑洞，無人理……

呢啲職場冷暴力用集體沉默製造認知失調，當你開始懷疑「係咪我人緣差」，就中咗圈套啦。

遇到呢啲事，最緊要睇開啲。只要份糧準時出，照樣返工放工。無咗瑣碎事，仲多咗時間進修同研究《僱傭條例》。法律寫明賠償唔係施捨，係《僱傭條例》寫明嘅「對等尊嚴」！

網民A：仲有叫你放大假或放無薪假

網民B：做錯少少嘢就畀警告信你！

網民C：一直都有呢啲公司！

網民D：我的公司以未達營業額為理由減工時！公司好多違規行為！收集中！要反擊！

網民E：我哋飲食業也一樣，初初就高人工，做耐啲就比多啲工夫你，又調去唔啱做嘅位置，美其名話學唔同崗位，其實係想你走。

網民F：我之前份工返了4年，後來因為入醫院請咗病假，一出院第一日manager就同我講你不如休息下啦，叫我自己辭職。

網民G：我請3個月假，公司私自搵受托強積金寄來離職信！後對質公司死口不認！返左工後針對性減我工時！

網民H：「提速，提效，提量，提質」「識變、應變、求變，新質」公司口號……