Next
【職場趣聞】老闆唔畀員工討論人工 事主：點解可以咁？
【職場趣聞】老闆唔畀員工討論人工 事主：點解可以咁？
2024-11-28
薪酬福利一向是打工仔最關心的問題，人工多寡隨時影響員工的工作態度及離職時機。最近有網民在香港討論區發文，指上司不允許同事之間討論薪酬問題。到底討論薪酬問題是員工之間的自由，還是影響辦公室氣氛的導火線？一眾網民又有甚麼看法？
按圖了解事主經歷：
事主：有日食Lunch同幾個相熟嘅同事吹吓水，咁啱講起人工問題。
事主：大家都無乜所謂，講吓自己人工有幾多。
事主：咁啱老闆行過聽到，即刻捉咗我入房叫我唔好再傾呢啲話題⋯⋯
事主：乜原來合約有規定僱員唔准傾人工？點解可以咁？
事主：我就係諗極都諗唔明⋯⋯有無人可以解答吓？
即睇網民回覆：
網民：間公司人工低咪會咁⋯⋯
網民：老細唔畀你傾多數係因為如果你人工比你同級嘅同事低，怕你會鬧辭職。
網民：私人市場多數人工都係不公道安排，所以唔可以討論，免得自己傷心⋯⋯相反大公司、政府工咩位就咩價，加埋年資、專業資格⋯⋯全部有個表唔使討論，係人都知。
網民：合約無唔畀講咪講，有咩問題？
網民：是非問題，畀員工周圍講會招人妒忌同離間同事，影響士氣同團隊工作效率。
網民：唔准公開討論咁咪Whatsapp傾。
網民：自己圍內偷偷地傾就算，唔好畀老闆知就最好。
網民：第一日出嚟做嘢？每間公司每個員工嘅人工都應該係保密唔講得出嚟㗎啦。
網民：人工一向都係公司機密！當然好多同事會私底下傾。
網民：如果你發現坐你隔離個同級同事人工多你$2000你會點呀？
網民：其實唔知好過知。平常心、凡事盡己所能、安份守己，如果都未能升職加薪可以選擇離開。每個人心目中都有把尺，值唔值自己最清楚。
網民：人工呢個話題你私底下傾上司邊度理得到你啫？但你哋喺公司度高談闊論佢可能會覺得你哋向公司挑機囉。
網民：咁基本嘅職場規矩都唔明？
網民：其實你代入老闆角度諗就會覺得唔係好難理解啫！同工唔同酬、有是非⋯⋯即使同工同酬，做嘅嘢多與少都有嘢講。
網民：我以前做過幾間大公司，員工手冊寫明唔可以透露自己人工或者同其他同事討論，否則可以即炒！
網民：同大陸職場文化幾似，同事間好少會問人薪酬。
網民：因為通常較低人工嗰個知道後都會搞事。
網民：其實點解會有人將自己嘅人工講出嚟㗎？
網民：人工咁私隱嘅資料都保密唔到，仲使旨意你保護客戶同公司利益？就好似商人從來唔會同不孝子做生意嘅原理一樣。
網民：私隱問題，公司可能驚有人搞事，帶頭起鬨加人工。
網民：呢啲喺公司就盡量避免講啦，就算老細唔Care啲老海鮮都好Care⋯⋯
真係想八卦咪同Friend食晏嘅時候去間遠少少嘅Cafe講囉，唔好為咗人工大大聲得罪人。
薪酬問題低調討論
事主經歷引起不少網民討論，有部分網民同樣不解為何公司沒有討論薪酬問題的自由，指：「合約無唔畀講咪即係可以講，有咩問題？」但留言並未獲得廣泛支持。有豐富工作經驗的網民表示，「有幾間大公司嘅員工手冊都寫明唔可以透露自己人工或者同其他同事討論，否則可以即炒！」不論員工手冊有否註明員工可否討論薪酬問題，於公司對這種敏感的高談闊論確實有機會引起同事的不滿情緒。低調討論，同事間既能互相了解，又不會影響辦公室的氣氛。
延伸閱讀：【2023年加人工】香港打工仔預計平均加薪3.8% 僅15.5%企業打算增加員工人數
延伸閱讀：【職場熱話】做老師假期多人工高好輕鬆？網民斥做老師點會輕鬆！
延伸閱讀：【轉工原因】份工悶、人工低欲辭職？網民：你唔做會後悔！
Look out for further updates on our Facebook fan page!
Related Articles
Follow CTgoodjobs for the latest career news, hot topics and recommended jobs!