【職場熱話】調職後發現全能下屬點算好?網民:要小心先坐得穩
職位反映了企業對員工的不同期望,經理較文員擁有更高權力,可擔當的工作也會更多。假如低層職員工作受到同事認可,能力更勝上司一籌,上司是否要擔心一下自己的位置能否坐穩呢?最近,網上討論區「連登」有一名中層打工仔發文,聲稱早前獲公司調派至另一部門,怎料遇上了一名全能下屬,感到困擾。
延伸閱讀:【職場熱話】新入職下屬係中學學霸 舊同學上司:而家佢要聽我講
即睇發文者分享及網民回應:(按圖了解)
事主:公司調咗我去第二個部門做,本身啲嘢自己無做過。嗰度有個做咗幾個月嘅assistant,好似好醒咁,已經咩都識,啲人有咩都係搵佢。啲嘢我自己就未上手,同事就畀晒佢做,自己無咩搞咁……
網民:唔好同佢太熟,少啲交流,熟咗的話,個個以為你跟佢!
網民:越無料嘅通常都做到越高層。
網民:如果人哋坐得穩嘅,一定唔會係無料囉!識湊老細、識做人已經贏過大多數人。嘢就大把人識做,人未必。
網民:做上司唔使識,最緊要識平衡術,例如留意吓有冇人唔多妥嗰條友,你就又培養下佢。
網民:越畀得多嘢下屬做,代表上司技能越好。
網民:如果feel到有人唔like佢,而佢又同team入面其他人或同上司關係好,就埋佢堆,多數冇死錯人。
網民:等有人控制下佢,如果畀佢坐大,你老細都注意到佢,你就麻煩。
網民:如果條友人緣極好,你就唔好畀啲有亮點嘅job佢做,等佢做啲日常營運嘅嘢,而重要嘢都唔好畀死一個,一人一次,冇人出頭威脅你,你個位先至穩。
網民:情願培養一兩個冇咁叻,但忠誠嘅人做心腹,都唔好旨意啲醒目仔,養唔熟,隨時反咬你。
網民:呢個世界其實有好多人叻過自己,你都唔會阻止到有人叻過你,點解唔可以一齊進步?
網民:啲人思想就係咁乞人憎,個個都忌才,真係叻嘅人其實分分鐘只當你公司係中轉站。
網民:認真問,啲人打份工真係會諗咁多嘢?我自己返工真係返工就算,唔做都冇問題,冇諗咁多呢啲人事嘢。
網民:我嗰度有個同事早我一個月入職,大家職位差唔多,都係technical嘢,但係明顯想control住我,成日同老細講話會睇住我。
坐穩高位要耍手段?
多名網民認為,事主應該要小心威脅,避免「坐不穩」現時職位。有些人勸告事主應了解部門的人事關係,靠一些同事去抗衡威脅,例如培養忠誠下屬去控制全能下屬的火焰,又抑或指派一些較簡單工作去控制發揮機會。有人指,如果老闆察覺全能同事,事主隨時有麻煩。
忌才思想不要得
某些網民批評多個留言的「老海鮮」忌才心態,直斥「啲人思想就係咁乞人憎」,不明瞭為何人總是要視對方為你死我亡的假想敵,而非一起進步的動力。其中一人更指,有才之士或只當一個工作空間為中轉站,沒有任何挑戰上級打算。
另有人好奇,為何那麼多人會醉心於辦公室政治,並指「自己返工真係返工就算」,無暇理會其他人事關係。
處理與上司嘅關係可謂職場藝術,留意以下5個可以一秒激嬲上司的錯誤,提醒自己唔好做出呢啲事!(按圖了解)
延伸閱讀:【辦公室血淚史】老闆為發洩情緒向員工人身攻擊 可以構成職場欺凌?
延伸閱讀:【職場熱話】女上司情緒反覆難相處 事主:突然聽到佢間房有巨響⋯