推動三方協作 促進勞資和諧

小雲在公司聖誕聯歡會遇到人事部主管Kelly姐，兩人談到公司的勞資協作機制。

Kelly姐：「小雲，聖誕快樂！之前聽你講覺得壓力好大，依家見你神采飛揚，似乎無事啦喎！」

小雲：「係啊，多謝你之前同老闆提議設立勞資協商委員會，令我哋可以喺會上向管理層表達意見，坦誠討論同協商我哋嘅權益同福利。」

Kelly姐：「公司之前想推行改革計劃，都知同事未必適應到，所以我同老闆提出檢討現行溝通渠道同建立雙向溝通機制。設立勞資協商委員會，就可以集思廣益，等員工參與不同層面嘅決策。老闆話多得大家嘅建議，改革行得好順利。」

小雲：「太好啦！委員會由每一個部門派出員工代表組成，主席就由有決策權力嘅管理層出任，有咗呢個平台，同事可以直接同管理層同各部門嘅同事溝通啦！討論範圍仲相當廣泛，包括工資調整機制、福利同待遇、工作安排、表現管理同晉升制度等。主席仲會喺每次會議開始前總結同評估返上次會議嘅成效，再作出相應跟進、改善同調整。」

Kelly姐：「勞資協作真係好重要。政府都透過勞工顧問委員會呢個三方協作平台，同僱員及僱主代表坦誠溝通同交換意見，推動勞工政策同改善僱員權益。」

小雲：「原來係咁。我哋唔好講住啦，快啲食嘢先！」

資料來源: 勞工處

⏩⏩  需要請人？立即刊登招聘廣告！  ⏪⏪