工資權益 僱員要識

阿超在茶水間與人事部經理Mandy談及僱員工資權益。

阿超：「唉！又到稅季喇，年尾又使突咗，仲要幫囝囡報興趣班。」

Mandy：「你冇睇銀行戶口咩？公司上個月已經連埋年尾雙糧自動轉帳咗啦！《僱傭條例》規定，僱主必須盡快支付所有工資畀僱員，喺任何情況下都唔可以遲於工資期屆滿後七日㗎。更何況我哋公司出糧一向有早無遲嘅。」

阿超：「好彩入咗間好公司咋。」

Mandy：「其實所有公司都要遵守《僱傭條例》規定。僱主如果故意同埋無合理辯解而唔依時支付工資畀僱員，可以被檢控，一經定罪，最高可被罰款 35萬元同埋監禁三年。另外，僱主都要就欠薪畀利息㗎。」

阿超：「咁如果真係有打工仔咁唔好彩俾公司拖糧，咁點算啊？」

Mandy：「應該盡快向勞工處求助同埋舉報違例欠薪情況，協助勞工處調查並擔任控方證人。如果有足夠證據，勞工處會向違例僱主提出檢控。另外，僱員如超過一個月仍未獲發已到期嘅工資，可以當僱傭合約已被僱主終止，僱主須支付僱員解僱代通知金同埋其他解僱賠償。」

阿超：「如果打工仔想知多啲自己嘅工資權益，可以去邊到了解啊？」

Mandy：「想知更多有關工資嘅保障，可以睇下勞工處嘅《僱主精明盡責  出糧依時守法》以及《工資權益  僱員要識》小冊子。」

資料來源︰勞工處

⏩⏩  需要請人？立即刊登招聘廣告！  ⏪⏪