【勞工處】工作形式雙方定 辨清身份保權益

資料來源：勞工處

阿明剛開始做兼職速遞員，向表姐小雲請教相關的勞工法例。

阿明：「公司叫我改簽一份自僱人士合約，而唔係僱傭合約。有咩唔同㗎？」

小雲：「要分辨僱員定自僱人士呢兩種身分，須要考慮所有相關嘅因素，例如對工作程序、時間同工作方式等安排嘅控制權、工作時係咪需要自備所需嘅工具同物料、係咪自行經營業務同有冇負上投資及管理責任等。」

阿明：「公司會規定我嘅工作時間同方式，仲提供全部工具，我只係收人工，會唔會係『假自僱』呢？」

小雲：「可能係㗎！所以你要同公司了解清楚自己屬於僱員定係自僱人士。同自僱人士唔同，僱員係享有《僱傭條例》、《僱員補償條例》同埋《最低工資條例》嘅僱傭權益同保障㗎！」

阿明：「如果公司堅持要我做自僱人士咁點呀？」

小雲：「僱主唔可以單方面將員工轉為自僱，否則僱員可以視乎個案情況，根據《僱傭條例》下有關不合理更改僱傭合約條款嘅規定，向僱主提出補償申索。如雙方有爭議，最終會由法庭作出裁決。」

阿明：「明白！多謝表姐。」

小雲：「其實喺你入職前，你可以按《僱傭條例》嘅規定，以書面要求僱主提供有關僱傭條件嘅書面資料，咁就減少之後嘅爭議啦！想知多啲，你可以參考勞工處相關嘅小冊子㗎！」

⏩⏩  需要請人？立即刊登招聘廣告！  ⏪⏪