兼職及暑期工須知

就讀大學的Steve最近找到暑期工，他為了答謝小雲幫助他準備面試，就請她吃午餐慶祝。

Steve：「我上星期見工得咗，嚟緊下星期正式返工。」

小雲：「恭喜晒喎！等我考吓你，暑期工受唔受《僱傭條例》保障呢？」

Steve：「當然受保障啦！不論係『暑期工』或『非暑期工』，『全職』或『兼職』，只要屬於僱員身分，都可以享有《僱傭條例》所賦予嘅福利同保障。所以我哋入職前，一定要先分清楚自己係僱員定係自僱人士。」

小雲：「答得啱！咁你今次係用書面定口頭方式同僱主訂立僱傭合約？」

Steve：「我哋用書面僱傭合約。雖然口頭訂立嘅僱傭合約都受《僱傭條例》保障，不過梗係書面僱傭合約好得多啦。因為書面僱傭合約清楚寫低勞資雙方嘅權益同責任，可以減少不必要嘅誤解同糾紛，對雙方都有保障。僱員喺簽僱傭合約前，要了解清楚合約條款同細節，例如薪酬福利、工作時間同埋終止合約所需嘅通知期等。」

小雲：「果然好醒目喎！不過我都要提提你，除咗喺法例規定嘅特殊情況外，如果日後你想向僱主辭職，記得按照僱傭合約同《僱傭條例》嘅條款預先通知對方，唔係就要畀代通知金作為補償㗎啦。開工前記得上勞工處網頁，參考一下《暑期工僱傭條例須知》呀！」

資料來源︰勞工處

⏩⏩  需要請人？立即刊登招聘廣告！  ⏪⏪