僱主謹慎處理扣薪　維持良好勞資關係

阿強早前因太太緊急入院做手術，匆忙間忘記打電話向公司請假。根據公司政策，如果僱員無事前通知下缺勤，事後又沒有解釋，公司可能會扣薪，人事部主任Mandy向洪老闆匯報事件。

Mandy：「老闆，阿強上個月最後一日冇返工又冇通知，公司已計埋嗰日人工準時出糧，即係出多咗人工。我提過阿強要補番證明解釋，雖然佢一直未交番證明，但又唔似講大話……老闆，我哋會唔會扣番佢嗰日人工？」

洪老闆﹕「Mandy，人工唔可以亂扣，你記得《僱傭條例》點寫嗎？」

Mandy：「記得，《僱傭條例》列明幾種僱主可扣人工嘅情況，例如只能扣除僱員實際缺勤時間嘅人工；僱員因疏忽或失職而損壞或遺失僱主嘅貨品、設備或財產，每次只可按值扣除，最多$300，總額亦唔能夠超過人工嘅四分之一；僱主預支或多畀嘅人工，可按數扣除，但不得超過人工嘅四分之一。除咗缺勤同未畀贍養費而扣除外，扣薪總額唔可以多過人工嘅一半。阿強今次冇打電話請假，公司嘅政策視為無故缺勤，我哋可以扣番多畀嘅人工。」

洪老闆﹕「啱，但除咗睇法例，我哋亦應以良好人事管理嘅原則處理，要情理兼備。阿強因為太太急病入院返唔到工，實屬情有可原。你再提醒阿強今個月出糧日前，交番有關證明，以符合公司嘅政策。如果佢到時仍交唔到證明，我就按佢平時表現，再考慮係咪酌情唔扣人工。」

兩日後Mandy向洪老闆匯報：「阿強已補交太太住院醫生紙副本，證明冇返工當日佢太太入院。」

洪老闆：「好，有文件證明佢嘅特別情況，我哋就酌情唔扣人工。我哋體諒阿強嘅情況，貫徹公司嘅良好人事管理文化，相信同事對公司會更有歸屬感！」

⏩⏩  需要請人？立即刊登招聘廣告！  ⏪⏪