【失業潮】80、90後為公司賣命多年只換來裁員！00後一句道破職場殘酷真相！

CTgoodjobs' Editor

Published: 2025-09-01 16:36

Updated: 2025-09-01 16:36

在職場競爭日益激烈的今天，許多80後、90後為公司付出多年心血，卻在裁員風潮中無情被拋棄，成為失業潮的主要受害者。企業為了追求效率和降低成本，往往忽略了這些員工多年來的努力與忠誠，導致許多人在職涯中途遭遇重大挫折。近日，有年輕的00後用一句話道破了職場的殘酷真相，引發熱議和共鳴。

00後一句道破職場殘酷真相！

+56

+55

樓主：
啲人成日批評00後對公司冇歸屬感、對份工冇熱誠，但請大家睇睇幾多80、90後投放咗幾多感情落份工，打咗10年工，結果公司裁員，一句唔該都冇，眨個眼就失業咗。

00後日日睇到呢啲裁員潮，返工仲可以有幾多熱誠？再講，被份工蹂躪緊／被失業嘅80、90後，而家都係乜熱誠都冇㗎啦！好想知批評人冇熱誠嘅，係咩位置嘅人？

網民A：
90後表示相當有同感。自問返過9份全職工，真係好想問返工係為咩？嚟緊返第10份工，希望呢份工會畀到答案我。

網民B：
我有幸返過一份好好嘅工，當時真係可以用「鍾意返工」嚟形容，成條team連瞓覺都會諗緊個project點樣可以再完美啲。但COVID一殺到，生意大跌，公司突然有一朝早裁走咗一半人，然後就冇然後。

網民C：
如果冇熱誠，返工只會行屍走肉咁，日日捱時間，唔想做。

網民D：
唔批評點鞭策你哋呀？

網民E：
唔係要對公司有熱誠，係對自己嘅工作有熱誠。認真做自己嘅嘢，做得好就係自己嘅得着，提升自己嘅價值，隨時都可以轉公司。

網民F：
返工不嬲講金唔講心，為公司仆心仆命係你蠢。

網民G：
02後路過，遇到好老細，同埋對所做嘅嘢感到有意義、有希望、有野心，所以有熱誠。

網民H：
返咗十幾年工嘅old seafood，返工從來唔講熱誠，一切都只係為錢同升職。鬼叫原生屋企窮？不過基本做人操守要有，拎得份糧，working hour內做好本份。忠誠度呢樣嘢，係香港5、60後先會有？由我出嚟做嘢開始，已經冇見人講忠誠度。你見做到10年8年，甚至退休嗰啲，大部分只係冇競爭力又懶得走出comfort zone，所以轉唔走。

網民I：
咁你咪開間公司，過下裁員癮囉！你自己又冇公司，又唔使孭公司數，梗係咁講啦。

網民J：
好pay，有職升咪有熱誠。返工咋大佬，又唔係同佢過人世。

網民K：
最鍾意玩手段嗰班係60、70後，係你唔知啫。

網民L：
其實你講緊嘅係兩個概念：一個人對公司有冇歸屬感、對工作有冇熱誠，同一個人返工係咪盡責、係咪敬業，係兩回事。好多80、90後都唔會一份工做到退休，有好機會就會跳槽，講唔上忠誠，但會認真盡責做好佢哋嘅工作。00後嘅問題係工作態度，唔係忠誠度——希望出少啲力、做少啲嘢，但同時出更多糧。喺香港，冇乜人會要求你返工有熱誠，但會要求你有責任感，唔好揸流攤。

（利申：其實我唔贊成用年代去標籤人，每個年代都總有盡責同唔盡責嘅人。我上面嘅例子主要係回應樓主嘅言論，用最典型嘅標籤解釋返唔同年代嘅人嘅分別。）

網民M：
90後路過，而家返緊一份冇熱誠嘅full time，只有喺內容創作同健身搵到熱誠。每日都反思緊：「我今日嘅所作所為，其實係咪創造緊我想要嘅事物同經歷？究竟我過緊咩人生？」諗諗吓，好快有答案。

近年職場環境充滿變數與挑戰，90後、00後等不同世代對工作的態度各有不同。部分人回顧多次換工經歷，質疑工作的意義與價值，盼望新工作帶來答案；另有經歷過熱情澎湃團隊氛圍卻因疫情突如其來的裁員而失望。對於熱誠，有人認為應該投注於自身工作，不求企業回報，專注提升自我價值；也有人直言工作多為謀生，不應過度付出。忠誠度不再是主流，取而代之的是責任感與敬業精神，且跳槽成為常態。雖然世代間存在差異，但核心在於在變動的職場中保持專業，實事求是地對待工作，不被標籤限制自己。

延伸閱讀︰【中年危機】自願減薪都冇人要？40+失業大叔血淚控訴網民：40歲後CV直接入垃圾桶

+21

+20