【勞工處】工作形式雙方定 辨清身分保權益

阿文剛入行做冷氣技工，一次安裝冷氣機時不慎受傷，卻被公司指他是自僱人士而拒絕作出工傷補償。阿文心感疑惑，於是向表姐小雲請教。

阿文：「表姐，我做嘢時意外整親隻腳，但公司話我係自僱人士唔肯賠償，到底點先算係僱員，點先算係自僱人士呀？」

小雲：「要分辨僱員定自僱人士，要睇好多因素，例如對工作程序、時間同方式等安排嘅控制權、工作時係咪要自備所需嘅工具同物料、係咪自行經營業務，同有冇負上投資同管理責任等。」

阿文：「公司規定我嘅工作時間同方式，工具都係佢哋提供，我只係收人工，咁我應該係僱員啦！」

小雲：「可能係㗎！同自僱人士唔同，僱員可以享有《僱傭條例》、《僱員補償條例》同埋《最低工資條例》嘅僱傭權益同保障㗎！」

阿文：「如果公司堅持話我係自僱人士咁點算呀？」

小雲：「只要雙方實質上存在僱傭關係，就算僱主聲稱僱員係自僱人士，甚至僱員喺合約入面被稱為自僱人士，僱主仍須履行佢喺有關勞工法例下相應嘅責任，包括支付工傷補償。」

阿文：「明白啦！多謝表姐。我會再同老闆傾下。」

小雲：「希望你快啲好返同埋可以獲得應有嘅補償啦！如果想知多啲，你可以參考勞工處出版嘅有關小冊子。」

勞工處《工作形式雙方定 辨清身分保權益》小冊子

⏩⏩  需要請人？立即刊登招聘廣告！  ⏪⏪