【伏工特徵】新同事返工2周就辭職！中階層打工仔發牢騷斥同事做1件事？網民反問：你仲想人Care你感受？

2024-11-06

工作是伏與否，有時親身體驗過才知道。如果覺得新工作不適合自己，你會選擇「繼續堅持」還是「盡早離場」？有打工仔在Threads發文講述擔任上司的苦惱，指新同事工作2周後就辭職，更因為對方1個行為而抱怨。了解事主的經歷後，網民不禁反問：「你還想別人顧及你的感受？」

點圖即睇事主經歷

+22

+21

事主：「到職2個星期嘅同事辭咗職，唔係第一次收信，但驚訝呢個同事辭職嘅原因，我已經對呢位同事好『呵護』。佢依然喺蜜月期，每日大約6點鬆啲閃人，佢做錯嘢，我會有耐性、私下解釋畀佢聽，連座位安排上都有齊隔籬左右照顧，而唔係冷冷清清，而且佢嘅工作量係同級嘅三分一，呢個同事係請咗3個半月先請到……

更想分享，作為supervisor嘅我會因為同事唔做，而感到壓力嘅原因（由大至細排列）：1.公司會覺得留唔到人係你責任（而唔係公司問題）、2.要即時將佢喺手上緊急嘅工作，分配畀其他人（而每人都工作量大）、3.短期3個月內預算工作要自己頂，同埋4.通知HR同協助安排後續。

而且最煩嘅係本身星期六有event，雖然辭職同事主動話可以返埋星期六，但係HR話唔可以，因為星期六原本屬於公司補假，所以公司要補三日糧畀佢……結果係我要臨時補上去返工。

下次建議如果要辭職，盡量日頭辭，唔好夜晚10點Send WhatsApp Message畀上司。（雖然辭職係大晒）」

網民回應：

A.6點鬆啲閃人叫應份唔係蜜月期……

B.返咗兩星期都咁多嘢講，呢位人兄走得遲添啦。

C.3個半月先請到人……係嗰位太差定candidate太冇用？

D.人哋都釋出善意肯主動返埋星期六，你要鬧就應該鬧公司孤寒，唔肯補3日糧搞到你要OT。

E.辭職仲要就埋你？你無嘢呀嘛？

F.完全明白作為中層嘅苦況，同埋我都唔明點解唔第二朝先遞辭職信。自己唔想OT，都唔應該迫老細放工都要處理公事。

G.其實都好明白忙嘅辛酸，有時都唔係自己控制到，而係受公司文化影響，但係香港就係咁……了解呢種文化唔啱自己，而出面又有offer，當然早走早着…… sad but true。

H.圍爐，我嗰行都係蜜月期先有得6點收工，係約朋友食晚飯約得多，先發現自己每晚8點先離開公司係好唔正常，仲要我返到屋企都會online一陣。

I.辭職應該咩時辰好啲？

J.辭職仲要擇時辰，大癲。夜晚辭都係第二朝先處理到㗎啦，HR 24/7？

K.6點鬆啲？！你份糧唔同老細講出鬆啲？

L.準時收工都已經係福利，無陰公。

M.點解返左兩個星期嘅同事，會expect佢自己處理哂星期六嘅活動嘅？請問係咩類型嘅活動？請問佢係咩title？M？AM？前線？

我試過work from home嗰陣夜晚7點幾8點打電話同上司辭職，講緊入職嗰間公司由第一日起開始已經OT做咗8個月，工作量同壓力大到星期六日都要做嘢，平日做到夜晚11至12點，可能真係能力不足啦，而且同公司文化夾唔到。但如果夜晚10點嚟辭職，似乎係幾大壓力下忍唔住要走。

唔合適嘅員工，早啲走係好事。另外面試嗰陣要畀合理期望candidate，咁先可以減少試用期流失嘅機會。

N.人哋辭職又肯返埋星期六，都算係咁啦，仲想人哋care埋你感受……？

同埋有時辭職唔關呵唔呵護事，或者係人哋搵到份更好呢……準時收工同埋照顧吓新同事，其實我覺得係基本，係應份……

事主的經歷引來網民熱議，大部分網民認為新同事已經盡人事，上班2周才辭職，更答應在星期六上班，反責怪事主太苛刻，強調準時收工是應份，並非蜜月期專享。有同為中階層打工仔的網民指，明白事主的感受，坦言能控制到的事不多，很多時事情都是受公司文化影響。有與新同事類似經歷的網民就認為，事件中的新同事選擇於晚上辭職，似乎是壓力過大所致，建議事主應該在面試時給予應徵者合理期望，這個安排或能減少試用期員工流失的機會。

雖然在試用期辭職是天公地道，但在晚上發訊息辭職，的確是打擾到上司休息的行為。若想要辭職的話，在日間發送電郵告知離職的決定會是比較好的方法。

應該如何寫辭職信？（點圖了解更多）

+10