【家庭關係】老公鍾意招呼同事上屋企食飯老婆不滿：次次都黐飲黐食

2022-01-19

家家有本難唸的經，當戀人步入婚姻後，總會有各式各樣的爭執，影響家庭關係，而金錢是其中一樣常見導火線。最近有女網民在討論區申訴，埋怨老公經常招呼同事到家中吃飯，每次都要額外花費一筆錢宴請客人，令她心生不滿。

延伸閱讀：【家庭關係】屋企人只會講錢？打工仔心灰︰淨係出糧先搵我

點解女事主會如此生氣？（按圖了解）

+15

+14

女事主：「老公經常都會叫同事上屋企食飯，之前同事A食完一次，日日都話要上嚟。試過同事B收工喺我哋屋企附近，老公又問我可否請佢上嚟，我話我煮乜佢就跟我哋食乜。到今晚，老公話聽日同事ACD喺附近收工，想叫佢哋上嚟食飯。我極速拒絕，話咁多人唔方便喎，屋企邊有位？點知老公話最多咪大家坐喺地下打邊爐。」

「我忍唔住講：『又請人嚟食飯，好多錢咩？』之後佢勁嬲：『你唔想咪話唔方便，使唔使咁講嘢？』佢望實我重複咗四次同一句說話，我無望佢無出聲，因為我都好嬲！其實我個人唔太喜歡招呼客人，但我老公係嗰種就算返工幾攰，一要招呼人就好熱情嘅人。加上特別同事A專屈人請食飯，攞人著數，我極唔想見到佢。老公試過因為怕朋友畀錢請我哋，就堅持提早同我去買餸，然後佢送人搭車同洗碗。次次上嚟都係我哋畀晒錢，我哋生活都過得不易！」

網民意見：

網民A：下次佢想請人嚟食飯，就叫佢自己買洗切煮，你只負責食同吹水，包佢唔會再請人嚟。

網民B：如果唔係疫情嚴重，我唔介意老公請朋友來家中聚會，可以融入老公嘅朋友圈呀。試想下如果佢自己去人哋度玩，或者去酒吧飲酒，豈不是更衰？

網民C：大家買外賣一齊食夾返錢得唔得呀？洗碗煮嘢會曬咗好多傾計嘅時間，你哋提供地方畀大家聚會已經好好。

網民D：疫情嚴重，無謂搞聚會啦。

網民E：明白你有理由唔開心，但嗰句「好多錢咩？」，我諗係男人都會覺得好難聽。

網民F：你老公係咪好要面子嘅人？人哋開口上嚟，就唔會拒絕。

網民G：次數真係太密，我覺得佢要慷慨請人上嚟食飯，都要尊重你感受。

網民H：我老公都好鍾意請人食飯，早幾年新居入伙，成日搵人上嚟仲要唔收錢。之後我同佢講再叫人上嚟唔該收返錢，唔係就唔好上嚟。不過有樣嘢好，佢全程自己一腳踢，次次都係佢負責洗煮，我唔會幫佢手。

兩夫婦相處之道莫過於溝通，要學懂聆聽對方需要，互相遷就，才可成就一段長久的關係。有網民提及女事主的一句「又請人嚟食飯，好多錢咩？」，讓人聽得不舒服。事實上，不論在家庭或職場上，說話方式都是十分重要。以下有5種不討好的溝通技巧，大家千萬不要犯！

按圖了解更多：