暑期工合約知多啲

小記訪問就讀工商管理的Katie，有關大專生的暑期活動。

小記：「就嚟放暑假，你搵到暑期工未啊？」

Katie：「搵咗喇，有間人事顧問公司請咗我，下星期就返工喇。」

小記：「恭喜你啊！等我考吓你先！暑期工受唔受勞工法例保障呢？」

Katie：「當然受保障啦！只要屬於僱員身分，不論係『暑期工』或『非暑期工』，都可以享有《僱傭條例》所賦予嘅福利同保障。所以我哋入職前，一定要先分清楚自己係僱員定係自僱人士。」

小記：「啱！咁僱傭合約可唔可以用口頭方式訂立呢？」

Katie：「可以。口頭訂立嘅僱傭合約都受《僱傭條例》保障。不過梗係書面僱傭合約好好多啦，因為書面僱傭合約清楚寫低勞資雙方嘅權益同責任，可以減少不必要嘅誤解同糾紛，對雙方都有保障。僱員喺簽僱傭合約前，應該了解清楚合約條款同細節，例如薪酬福利、工作時間同埋終止合約所需嘅通知期等。」

小記：「如果僱主想更改合約條款同工作性質，暑期工可以點做？」

Katie：「僱員喺考慮接受前，要先清楚了解轉變嘅詳情。有疑問嘅話，最好同屋企人商量或者向勞工處查詢。」

小記：「Katie，你真係好醒目喎！」

Katie：「哈哈，唔係佢哋點會請我啊！各位同學仔，開工前記得上勞工處網頁參考吓《暑期工僱傭條例須知》啦！」

《暑期工僱傭條例須知》
    

⏩⏩  需要請人？立即刊登招聘廣告！  ⏪⏪