茶記30蚊早餐用「金牛」找數 OL堅持「唱散」終被伙記奇招K.O.

茶記30蚊早餐用「金牛」找數 OL堅持「唱散」終被伙記奇招K.O.

【晴報專訊】本港有不少小商店都寫明拒收500或1,000元大鈔,以減低收到假鈔的風險及避免零錢不足。有茶餐廳伙記日前在網上大吐苦水,指一名女白領前來吃盛惠30多元的早餐,但竟以千元紙鈔埋單,更表明「就係想你找散畀我」。而他們亦非「省油的燈」,結果成功「反敗為勝」,女白領足足苦候1小時才能拿回900多元找贖。期間,女白領一度崩潰稱:「其實我有散紙㗎,我而家就埋單,唔使唱散好唔好?」

OL表明想找散大紙
「希望咁多位貴客要知道舖頭係冇義務去幫各位打散你地啲大紙,一個係咁兩個係咁,個個都係咁......係咪各位搞錯咗啲咩呢?」該名伙記向Facebook群組「西客之道 Hispitality Secret」投稿,指他在一間平民餐廳工作,日前早上9時許,一名女白領吃完價值30多元的早餐後,以1,000元紙鈔埋單。他見狀後「即時反白眼」,向對方表示:「小姐,有冇細張少少嘅?冇咁多散紙找唔開。」未料,對方竟回應道:「冇喎,我就係想你找散畀我呀嘛!」

伙記發現OL銀包內有散紙
而且,女白領對「找散」亦甚有要求,並不接受10元、20元紙鈔,直言「散成咁梗係唔得啦」。伙記於是建議她「放低啲嘢係到抵押,出去唱散完返嚟埋單」,但她反駁道:「點解要我放低啲嘢做抵押呀,你哋自己出去唱囉,我而家畀咗1,000等住你哋找返900幾蚊畀我呀!」但伙記當時卻看到,女白領的銀包內「藍色、緣色、紅色都有」,「係要拎張金色出嚟,就唔好怪我哋唔客氣啦」。

伙記出招玩殘OL
於是,該名伙記叫另一名同事外出幫忙「唱錢」,更特別囑咐「唔需要急,最重要啱」。

15分鐘過後,OL女:得未呀,唱個錢要咁耐咩?

我:係㗎,朝早係難啲唱錢㗎啦

半個鐘之後,OL女:有冇搞錯呀,你地係咪偷錢㗎,咁耐嘅?

我:當然唔會啦,我哋同事喺銀行排緊隊,好快就到佢啦

OL:去銀行排?周街都係舖頭你哋唔識唱?

我:唱錢梗係去銀行啦,唔係去邊到唱?

9個字之後,OL女:你同事返嚟未架?我返工遲到啦

我:係囉,真係有啲耐,請你再等等

OL女:其實我有散紙㗎,我而家就埋單,唔使唱散好唔好?

我:但我哋同事出咗仲未返,仲差你900幾蚊未找返呀!

1個鐘之後,同事終於返嚟

我:小姐呢到找返你9XX蚊,多謝!

佢走嗰陣我仲咇左個X到爆嘅笑容講:多謝晒,下次見!

最後,該名伙記在文中「得戚」地笑言:「其實同事過隔離舖唱錢只係5分鐘,不過去咗第二到食埋個早餐先返嚟啫,早知叫佢買埋餸先返嚟啦!」

網民笑言「大快人心」
此事引來網民熱議,不少人笑言「大快人心」,「一早睇到你個post,人都爽」、「心情一下子豁然開朗」、「一開始自己有嘅就畀散啦,態度又咁X,抵畀人玩」、「我成日都咁講,對付呢啲人,你要做得誇張過佢10倍、50倍、100倍,咁佢先識衰!」、「響茶記玩嘢=花式自殺!冇人買佢怕,仲陪佢慢慢玩」。另有網民認為,如果真的沒有「散紙」不是問題,問題在於女白領的態度:「我相信如果身上真係無細紙,客客氣氣同店家講聲,我估店家一定會諗辦法幫你打散嘅。」

此外,亦有不少網民感同身受,分享自身類似經歷,「以前做夾糖,啲人喺我一開門就夾嗰30幾蚊糖,畀張500我要我找,真心唔X知點樣找畀佢」、「我有啲客,一早開舖入黎影1元印,畀500元,目的係因為一陣去街市買餸,嫌街市找錢污糟,上嚟唱散佢」。

Look out for further updates on our Facebook fan page!

Related News

  • East Rift Valley National Scenic Area Administration, Tourism Bureau, MOTC kicks off 2019 East of Taiwan cycling festival in August

  • 上司可拒寫 Reference Letter?網民意見不一

  • 【熱話】劏房不平等租約 租務細節不清、濫收兩種費用

  • 炒魷無通知金「齋坐」一個月 打工仔無奈

We use cookies to enhance your experience on our website. Please read and confirm your agreement to our Privacy Policy and Terms and Conditions before continue to browse our website.

Read and Agreed