【職場文化】Workload一個頂兩個 做唔切被老闆鬧 網民:擺明恰你

【職場文化】Workload一個頂兩個 做唔切被老闆鬧 網民:擺明恰你

勞資雙方的目的往往存在衝突,僱員希望輕鬆工作可帶來高薪金,老闆希望用最少薪酬支出獲得最高產出,兩個看似對立目的需要合理的妥協才能達致可運作的僱傭關係。假如企業給予同事過多工作量,無疑會嚇怕打工仔,長遠會引致僱員流失。

最近,一名打工仔到社交媒體專頁「奴工處」投稿,哭訴公司長期要求「一個頂兩個」,更被責難工作慢,考慮應否離職。貼文一出,事主隨即獲多名網民鼓勵。

延伸閱讀:【辭職學問】壓力大到日日發惡夢 多次辭職不成功 員工苦惱:老細扮睇唔到我封信…

即睇事主分享及網民回應:(按圖了解)

事主:自從公司一直請唔到人,我要1個人做2個人工作,做到我終於頂唔順,搞到唔可以喺老闆娘設定限期內完成工作。佢就開始每日鬧我再無能力勝任工作,拖累成間公司,又話連累佢同其他同事要幫我一齊完成工作。久而久之,令到我都開始質疑自己工作能力,仲成日因為咁唔開心。我成日都日思夜想,係咪唔應該再勉強自己繼續留低,我應唔應該辭職,畀自己休息一下,再提升自己?或者呢份工一直請唔到人返嚟之後已經變咗質,真係唔適合我再繼續做呢?

網民:仲諗?
網民:打工仔第一法則:收幾多錢做幾多嘢!
網民:走啦,叫佢自己做返晒,睇下到時叫老闆娘問自己會唔會拖累公司。
網民:公司如果大方承認請少個人,叫大家一齊幫幫手,員工都還願意一齊捱。而家擺到明當你無腦,知你好恰,要你蝕底仲屈你工作能力有問題,耍埋啲職場PUA技倆,早走早著!
網民:咁仲唔走?公司根本唔會請人!
網民:當你話唔做,人工就會加!
網民:Quit啦!喺老細心目中印象一旦壞咗,極難可以扭轉。
網民:第日走多個的話,就會將三個人嘅工作量推落你度,如果有啲嘢你可以預期只會變差唔會好轉,就係你走嘅時候。
網民:再唔走,身體好易會有病,唔可以長期壓力下做人。
網民:照顧自己精神健康要緊啦,何必做到質疑自己呢?
網民:做到抑鬱,睇醫生條數仲多!返工啲錢都填唔返!
網民:走,人生苦短返工返到咁唔開心為咩?
網民:喺有能力無收入嘅情況下生活到1個月以上嘅,就辭職去休息下啦!
網民:可能你一走就請兩個人!
網民:唔需要懷疑自己,唔係你能力問題,係資源有限,如果我係你,會搵工,有後著就辭職,唔好因為公司影響自己,因為我曾經都有類似的情況。

 

職位不應長期出缺 啞忍減少聘新人意欲

多名網民安慰事主,工作不符合企業要求並非出自個人問題,而是源於不合理的工作量。多人批評該企業要求一人兼任兩職,但卻要求多多,呼籲老闆自己做一次,「睇下到時會唔會拖累公司」。另有網民建議事主「早走早著」,避免精神狀況繼續惡化。

在正常情況下,企業職位不應長期出缺。有網民分析,一些僱主假若看到有員工能夠「一個頂兩個」,便會將低聘請新人填補空缺的意欲,甚至會將更多工作放在同一個人身上,所以另有人回應:「第日走多個的話,就會將三個人嘅工作量推落你度。」

多名網民勸事主離職

網民幾乎一面倒支持事主離職,認為事主當下的職場生活已是非人生活,若有能力應該離職休息,避免令精神健康受損,有網民直言:「做到抑鬱,睇醫生條數仲多!」

無論如何,工作最重要是有合理的權利與義務,如企業不願給予員工有合理待遇,僱員會漸漸流失,更會影響辦公室內的士氣。

一人一個令你想辭職嘅原因!網民齊數工作慘痛經歷 只做appraisal 唔加人工?(按圖了解)

延伸閱讀:【職場熱話】工作量超標但老細唔肯請人 質問員工:點解要OT?

延伸閱讀:【職場熱話】力數上司6大罪狀 Last Day前踢唔踢爆佢好?

延伸閱讀:【溝通技巧】3大謝絕上司夜晚WhatsApp講公事嘅重點

⏩⏩  需要請人?立即刊登招聘廣告!  ⏪⏪

Look out for further updates on our Facebook fan page!

Jobs You Maybe Interested In

刊登招聘廣告
;