勞資互諒　共度時艱

資料提供: 勞工處勞資協商促進科

小記有見最近經濟情況，不同行業正面對減薪及裁員等壓力，於是向資深人力資源顧問Steven請教，僱主在經營困難期間，如何與僱員共度時艱。

Steven：「面對經營困難，僱主可以先考慮降低營運成本，仲可以諗吓點樣增加收入，例如研發新產品或者發掘新市場。如果無奈要安排僱員放無薪假，僱主應事先同僱員坦誠商議，亦要注意《僱傭條例》下有關停工同支付遣散費嘅規定 。」

小記：「若僱主無可避免要僱員減薪，雙方有咩要注意呢？」

Steven：「根據《僱傭條例》，僱主唔可以單方面更改僱傭合約條款，所以喺減薪前要得到僱員嘅同意。僱主應該務實咁同僱員商討並提供唔同嘅方案，例如減少部分福利，以降低減薪幅度。僱員喺了解清楚減薪方案後要慎重考慮係咪接受。」

小記：「若果真係要裁員呢？」

Steven：「僱主先盡量透過自然流失或自願離職方式去代替裁員。至於裁員準則就要客觀同公平。僱主要確保僱員可得嘅終止合約補償，唔少於《僱傭條例》同僱傭合約所賦予嘅權益，並向僱員詳細解釋補償嘅細節。僱主應盡量協助有經濟困難嘅僱員，如發放特惠款項。最好幫僱員寫推薦信，證明裁員同工作表現無關。同樣，僱員要問清楚裁員嘅補償詳情。」

小記：「如果僱員對自己喺《僱傭條例》下嘅權益有疑問呢？」

Steven：「佢可以去勞工處勞資關係科分區辦事處求助，或致電 24 小時電話查詢熱線 2717 1771 。」