求職不簡單:如何告訴對方「阿梅是最好的」?

求職不簡單:如何告訴對方「阿梅是最好的」?

Vichy Ho

香港大學中文學院講師,《上班前後一百天》、《跟喬布斯學PowerPoint演說》等書作者,大學生職前導航、面試語言策略等方面的資深顧問

More Blogs

上文講到自己申請教學奬時,被懷疑「你係Good喎!但申請得呢個奬都Good?你點證明你好過佢地?」同樣地,看到「兩萬五月薪,DSE畢業申請得」、「一萬八,無須學歷,只須半年工作經驗,補習都算」時,應對自己有信心但不要太興奮,因為在「供過於求」的求職市場,「申請資格」不等於「取錄資格」……咁!如何說服對方,提高自己獲聘機會?

坦白講,每次看到「XXX月薪,YYY資格就做到」的報道,又或者在讀網上招聘廣告的「申請要求」時,我們都一定會為自己做「體檢」。

「大學本科畢業」:嗯!我有;

「相關一年經驗」:嗯!我剛剛好!

「熟用ABC軟件」:車!我未入大學已用AB,仲教師弟用C,現在用埋DEF軟件啦!

「中英文書寫能力」:識「TGIF」算唔算?

這種「自我體檢」幾乎是反射動作,每人都會做(告訴你一個秘密:前述申請教學奬,我在閱讀申請資格時,直情認為個奬係為我度身訂造),但偏偏這種「自我體檢」對獲聘機會的用處遠比不上睇一齣「少林足球」!

我明!「少林足球」對你係恐龍時代的電影,周星馳這個uncle你聽過佢個名……唔好再話我老!我唔引「霹靂先鋒」、「咖喱辣椒」已經好「忍手」!

「少林足球」裡,男主角(即係姓周那個uncle)對濃粧艷抹的阿梅說:「你是最好的,你知道嗎?」

對!寫求職信、面試時,因為面對大量競爭者,你要做到的不是告訴對方「我符合你的要求」、「人地有的,我都有」,而是「我是你今天讀到、見到的人之中最好的」!

點做到?講易不易,講難好鬼難!因為你會說:「我如果好到天下無敵,就唔係我搵工,係工搵我啦!」……說話唔係咁講!因為「好」的定義各有不同,在跟其他求職者比較過程中,你當然要著重講「比較優勢」,即是「在這方面,我比其他人多一點點」,但「十隻手指有長短」,遇到自己只是「Good」不是「Excellent」的呢?嗯!方法有二:

第一:直接爭辯!例如「我真係無用過D呢個軟件,但呢個軟件只能做一種圖,遇到機會不多,而且如果獲聘,我會爭取時間在就職前學咗佢」、「我的英文會話一般,但現在營業額80%來自日本,係咪?」……當然!其實直接爭辯效果不彰,更容易把場面變成跟面試官的辯論會,例如「你話會學,我點解唔請個已經用開D軟件的?」「你咁講即係有20%的工作唔駛旨意由你做?」……所以先有第二點嘛!

第二:模糊缺點!即係「磨咗佢」!換言之:減低不是自己優勢的技能的重要性,例如「我真係無用過D呢個軟件,但我熟悉的A和B兩個軟件加來可以完全代替佢?」「而且我係網上教緊人用E呢套新軟件,暫時無太多人識」、「我英文會話唔好,但除中英以外,我學咗日文幾年」、「公司好似開緊條韓國line?作為韓粉,我的韓文基本溝通無問題」

回到正題,都是一、兩句話:放大自己的優點,模糊自己的缺點

附筆:唉!……其實後者呢招最常見係俾老婆怨嫁錯我時用……「我係搵唔到錢但我唔煙唔賭喎!」(你俾我搵到錢呀嗱……);「我係唔靚仔、頭髮又稀疏,但我對你專一喎!」(如果我靚仔、頭髮又濃密的話,你睇我會唔會……)

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Look out for further updates on our Facebook fan page!
Follow CTgoodjobs for the latest career news, hot topics and recommended jobs!
Maybe Later Follow