【讀者投稿】因為手臂有紋身被炒打工仔：老細話影響公司形象

2020-09-14

有紋身就等於壞人？這個想法太古老了！

近日，CTgoodjobs接獲讀者Marco的投稿，他表示自己在設計公司擔任設計師兩年，平時大多在辦公室工作，甚少出街見客，但上星期公司老闆投訴，指Marco因為手上有紋身，會影響公司形象，因此要開除他，令Marco大呻︰「根本係Cut資源，搵藉口嚟炒我」，大感不滿！

延伸閱讀︰【讀者投稿】收到Offer拖足三個月都無工返網民：寧願佢唔請我

Marco︰「我甚少見客，點破壞公司形象？」
Marco在該公司任職設計師兩年，期間過得一直安穩，而他亦自問是勤力的員工，他說︰「日日OT，其實我都無怨言，因為我明做呢行係忙係多嘢做，而且好多時都趕頭趕命，不過我真係無諗過公司咁突然炒我，而且係用我有紋身呢個理由囉！」問起Marco被炒當日的過程，他依然很憤怒︰「雖然呢排個市唔好，但公司都一直都相安無事，點知啱啱Work From Home返嚟，就feel到開始有異樣啦。我做細公司，個Office有幾大啫，平時老細有幾多時間喺公司，個個員工都知，之前老細好少坐喺公司，上兩個星期開始突然日日返嚟，仲係咁仲啲大粒嘢 (高層)開會，次次見啲大佬開完會都好煩咁，不過我呢啲做細嘅，點敢問咁多呀。直到上星期，我大佬有日叫我入房。」

Marco續說︰「大佬同我講，話老細決定咗同我終止合約，原因係我手臂有個紋身，話我咁樣會影響公司形象，我當下真係呆咗…做咗兩年一直都無講我有咩形象問題，會唔會係突然之間話我個紋身唔OK，然後炒咗我呀？！」Marco當日情緒不冷靜，但為了不破壞跟上司和同事的關係，他決定自己離開，他說︰「講真呢行好細，我都唔想大家關係咁差，我咪當休息吓，出去搵過另一個機會囉，不過我真係好唔明，我甚少見客，點破壞公司形象？」

延伸閱讀︰【職場心聲】店舖日日播洗腦歌！連鎖店員工︰放過我啦！

公司財困要節流就先向員工開刀
疫情對本港有幾大影響，單看失業率已經找到答案。Marco亦明白公司開除的目的︰「好明顯係想慳錢，之前老細又賴型咁唔申請咩保就業，我聽我大佬講，好似話唔想被其他人覺得公司唔掂喎，而家要炒人咪就核突。」Marco續稱，他現在積極搵工，因為還有大概三星期的通知期，希望可以趁這段時間找到新工作，重新開始。不過，問到他會否擔心前路時，他就話︰「無得驚咁多，有咩機會都要試架啦，好過咩都唔做，坐喺屋企無錢呀。」

延伸閱讀︰【讀者投稿】女朋友月薪4萬男友：佢搵得多過我但唔肯AA制